SIK-p soraarnerussutisiaqarnermut aaqqiissutai

Nalinginnaasumik paasissutissiineq 

Kalaallit Nunaanni suliffissaqartitsineq pisortanit aamma namminersortunit ingerlatsivigineqarpoq. Namminersortutut aamma pisortat ingerlassaanni sulinermi atugassarititaasut inatsisit aqqutigalugit maleruagassiorneqarnikuupput. Pisortani atorfilinnut atorfeqarnermi atugassarititaasut, inunnut ataasiakkaanut atuuttut aamma matumani isumaqatigiissutit malillugit maleruagassiorneqarnikuupput. Kinguliini allassimasut pisortani atorfilinnut taamaallaat atuupput.

Innuttaasut tamarmik 65-inik ukioqaleraangamik utoqqalinersiuteqalernissamut pisinnaatitaapput. Pisortani atorfeqaruit taakku saniatigut sulinerit aqqutigalugu akissarsinerit tamaasa soraarnerussutisiassannik isertitaqartarputit.

SIK-p isumaqatigiissutaa malillugu atorfeqaruit, illit sulisitsisullu qaammatit tamaasa soraarnerussutisiaqarnissamut SIK-p soraarnerussutisiaqalernissamut aningaasaateqarfianut Sulinermik Inuussutissarsiuteqartut Soraarnerussutisiaqalernissamut Aningaasaateqarfianut (SISA) akiliuteqartassaasi.

Akunnermusiaqaruit aatsaat 20-nik ukioqalernerpit kingorna sulisitsisut SISA-mut soraarnerussutisiassannut akiliisalissaaq.

Aallaavittut isigalugu soraarnerussutisiassannut aaqqissuussaq atorunnaarsissinnaanngilat. Tassa imaappoq aatsaat soraarninngoruit soraarnerussutisiassanut aningaasaateqarfimmit aningaasassatit pissarsiarisinnaavatit.

Tunniussineq 

60-inik ukioqaleruit soraarninngorsinnaatitaalissaatit aammalu SISA-mi soraarnerussutisiassatit tunniunneqassallutik. Aamma soraarninngornissat kinguartissinnaavat assersuutigalugu 65-inik ukioqalernissavit tungaanut. Soraarninngornissat kinguartikkukku soraarnerussutisiassat amerliartuinnassappput.

Soraarnerussutisiassavit amerlassusissaannut makku apeqqutaapput:
• Illit sulisitsisullu soraarnerussutisiaqalernissamut aningaasaateqarfimmut qanoq annertutigisumik akiliisimanersi
• Piffissami soraarninngorfivit nalaani qanoq sivisutigisumik inuuneqarsinnaanerpit naatsorsorneqarnera kisitsisit paasissutissallu tunngavigalugit naatsorsuineq

Kattuffimmi ilaasortaaguit soraarninngornissat sioqqullugu tassunga saaffiginnittariaqarputit, siusinaartumik sulisinnaajunnaarnersiutisiat imaluunniit utoqqalinermi soraarnerussutisiat pineqarnerat apeqqutaatinnagu, tamatumalu kingorna soraarnerussutisiaqalernissamut aningaasaateqarfiit saaffigalugu.

Kattuffimmi ilaasortaanngikkuit soraarnerussutisiaqalernissamut aningaasaateqarfimmut nammineq saaffiginnissaatit.

Siusinaartumik sulisinnaajunnaarnersiutisiat 

Siusinaartumik sulisinnaajunnaarnersiutisiaqaleruit, assersuutigalugu peqqiilliornerit pissutigalugu sulisinnaajunnaaruit soraarnerussutisiaqalernissamut aningaasaateqarfimmit soraarnerussutisiassatit pissarsiarisinnaavatit – aamma 60-inik ukioqalersimanngikkaluaruilluunniit. Siusinaartumik sulisinnaajunnaarnersiutisialinnut soraarnerussutisiat tunniunneqartarnerat pillugu maleruaqqusat immikkut ittut soraarnerussutisiaqalernissamut aningaasaateqarfiup maleruaqqusaani allassimapput.

Allaaserisat attuumassutillit

Kommune Qeqertalik
Postboks 220
3950 Aasiaat

Oqarasuaat: (+299) 70 19 00
Fax: (+299) 89 22 87
E-mail: qeqertalik@qeqertalik.gl
Nittartagaq: http://www.qeqertalik.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl
Aningaasaqarnermut Akileraartarnermullu Naalakkersuisoqarfik
Imaneq 4
Postboks 1037
3900 Nuuk

Oqarasuaat: (+299) 34 50 00
Fax: (+299) 32 46 14
E-mail: oed@nanoq.gl
Nittartagaq: www.naalakkersuisut.gl