Inissiap aningaasalersornissaa pillugu inatsit malillugu soraarnerussutisiallit taarsigassarsisarnerat

Nalinginnaasumik paassissutissiineq 

Inigisap nutarsarnissaanut akissaqanngikkaanni najugariinnassallugu ajornakusoorsinnaavoq. Soraarnerussutisiaqartuulluni imaluunniit siusinaartumik soraarnerussutisiaqartuulluni nutarsaanissamut pilersaarummut anginerusumut katersiniarneq ajornakusoorsinnaavoq.

Ilinnut soraarnerussutisiaqartumut imaluunnit siusinaartumik soraarnerussutisiaqartumut nutarsaanissamut taarsigassarsinermi akerlianik inigisap qanoq pisoqaassuseqarneranik imaluunniit qanoq angissuseqarneranik piumasaqaateqaanngilaq.

Iluarsartuunneqarnissaanut taarsigassarsinissamut taamaallaat qinnuteqarsinnaavutit, tassa imaappoq pitsanngorsaanermuunngitsoq imaluunniit alliliinissamuunngitsoq.

Inissiap pioreersup soraarnerussutisiallip inigisaata taavalu soraarnerussutisiaqartuusup katissimasaqarpallu katissimasaa peqatigalugu kisimi inissiamik piginnittuuffigisap iluarsartuunneqarnissaanut kommuneq 300.000 koruunit tungaannut taarsigassarsititsisinnaavoq.

Ukioqqortusillutit soraarnerussutisiaqarsinnaaguit, siusinaartumik soraarnerussutisiaqarsinnaaguit imaluunniit tjenestemanditut soraarnerussutisiaqarsinnaaguit soraarnerussutisialittut isigineqassaatit.

Katissimasaqarnermi inooqatigiinneq ukiuni kingullerni marlunni atasimappat aapparisatut nalunaarsugaq imaluunniit katissimasutut inooqatigisatut nalunaarsugaq naleqqiunneqassaaq.

Iluarsartuunneqarnissaanut inissiap allanngortillugu atorneranut siunertaqartumik taarsigassarsiaqarsinnaanngilatit, imaluunniit piisaarnermik kinguneqassappat.

Erniaqanngitsumik aamma akitsuuteqanngitsumik taarsigassarsititsineq matumani pineqarpoq, taannalu naapertorlugu inissiaq tamaat qularnaveeqquteqartinneqassaaq. Taarsigassarsititsinermi taarsigassarsiaasinnaasut allat inissiami isumannaallisarneqarnissaa eqqarsaatigalugu pingaartinneqarput.

Piumasaqaatit 

Soraarnerussutisiaqartutut taarsigassarsiniaruit piumasaqaatit tulliuttut naammassisimasariaqarpatit:
1. Iluarsartuussinissap aningaasalersorneqarnissaanut nalinginnaasumik piumasaqaateqarluni aningaaserivikkut imaluunniit realkreditinstitutsikkut taarsigassarsinissamut itigartitsissummik nalunaartoqarsimassaaq

2. Inissiaq ikuallattoornermut aamma illup ajoqusernissaanut sillimmaserneqarsimassaaq, aamma akiitsunik peqartoqassanngilaq

3. Katissimasat piginneqataappat iluarsartuunneqarnissaa aamma taarsigassarsinissamut qinnuteqaat akuerisimassavai

Qinnuteqarneq 

Qinnuteqaat allaganngorlugu sumiiffigisanni kommunimut nassiutissaaq, soorlu e-mailikkut imaluunniit faxikkut.

Qinnuteqaat makkuninnga imaqartinneqassaaq:
1) Iluarsartuussinissamut, pitsanngorsaanissamut imaluunniit alliliinissamut kissaatitut nassuiaat
2) Inissiaq pillugu nassuiaat, matumani pisoqaassusia, angissusaa aamma qanoq innnera
3) Suliarinerani katillugit aningaasartuutaasa missingersuusiorneri
4) Kommunimit nunaminertamik agguaassineq imaluunniit nunaminertamik inniminniineq, tassa suliaqartussaq nunaminertamik agguaassisoqarnissaanut piumasaqaateqarpat
5) Nammineq aningaasaliinissamut uppernarsaatit takutinneqarsinnaanerat
6) Qinnuteqartup inuuiata normua aamma najugaqarnermut uppernarsaataa
7) Inissiap pigineranut uppernarsaat
8) Qinnutartup pisortanut akilerneqarsimanngitsunik akiitsoqannginneranik Akiliisitsiniartarfimmit uppernarsaat

Malugiuk
Inissiap aningaasalersornissaanut taarsigassarsiniarlutit pisortanut qinnuteqaativit ataatsimut aningaasartuutaasa 0,5 %-ii akitsuutaasut illit akilissavatit. Akitsuut atorlugu qinnuteqaativit sullinneqarnerata aningaasartuutai matussusissavai.

Taarsigassarsiat akilersorneqarneri 

Taarsigassarsiat siullermik kommunimit tunniunneqartussaapput.

Taarsigassarsinissamut neriorsorneqarnerit annaassanngikkukku siullermik:
• Taarsigassarsinissamut neriorsorneqarninnit ukiut marluk qaangiutsinnagit inissiavit iluarsartuunneqarnissaa aallartissavat.
• Taamaattumik ukiut marluk iluini sanaartornerit aallartissimagit paasissutissartaanik nassiussissaatit
• Taarsigassarsinissamut neriorsorneqarninnit ukiut pingasut qaangiutsinnagit inissiat inaareersimassavat atulereersimassallugulu. Taamaattumik atulerneranut akuersissutip assilinera kommunimut nassiutissavat.

Tamakku malinngikkukkit taarsigassarsinissamut neriorsorneqarnerit atorunnaarsinneqassaaq.

Taarsigassarsiat akilersornerat
Illuliaq sanaartorneqareerpat najugarineqarsinnaalerpallu aatsaat taarsigassarsiat akilersorneqalersinnaapput. Taarsigassarsiavit akilersorsinnaanerinut makku nassiutissavatit:
• Kommunimit atulersinneqarnissaanut akuersissut
• Sanaartukkap naatsorsorneri inaarutaasut uppernarsarneqartullu
• Qularnaveeqqusiussaqarluni taarsigassarsinermi allagartaq nalunaarsuuteqanngitsoq allaqqaagaq, nalunaarsorsimasaq aamma stempelersimasoq
• Sillimmasersimanermut uppernarsaat
• Qularnaveeqqusiiffigisap nalunaarutaa oqaasertaligaq allaqqaagaq

Attavissaq 

Taarsigassarsinissamut kissaateqaruit sumiiffigisanni kommunimut saaffiginnissaatit.

Kommune Qeqertalik
Postboks 220
3950 Aasiaat

Oqarasuaat: (+299) 70 19 00
Fax: (+299) 89 22 87
E-mail: qeqertalik@qeqertalik.gl
Nittartagaq: www.qeqertalik.gl

Aningaasaqarnermut Sulisoqarnermullu Aqutsisoqarfik (ASA)
Aqqusinersuaq 5
Postboks 1039
3900 Nuuk

Oqarasuaat: (+299) 34 50 00
Fax: (+299) 32 44 48
E-mail: asa@nanoq.gl