Inaarummik naatsorsuutit takukkit

'Akileraarutikka' uani iserfigiuk

Nalinginnaasumik paasissutissiineq 

Inaarutaasumik naatsorsuummi ikippallaartunik amerlavallaartunilluunniit akileraarsimanersutit naatsorsorneqartarpoq. Akileraartarnermut Aqutsisoqarfimmi tamanna naatsorsorneqartarpoq, ukiumi aningaasarsiorfiusumi akileraarutitit katinnerat akileraarutissavinnut naatsorsukkanut sanilliunnerini tamanna nassaarineqartarpoq. Inaarutaasumik akileraarutissavit aningaasarsiatit akileraaruteqaataasussat tunngavigalugit naatsorsorneqartarput.

Akileraarnikippallaarsimaguit akiligassinneqassaatit. Taakkuuppullu akileraarutissat sinnerinik taaneqartartut.

Akileraarpallaarsimaguit utertoorutigissavatit. Taakku tassaapput akiliivallaarsimanermi utertitassat.

Akileraarutissat sinneri 

Akileraarutissat sinnerit amerlanerpaamik 18.000 koruunit tikillugit (16.981 koruunit aamma akitsuut 6% ilanngullugu) siumoortumik nalunaarummut ukiumut tulliuttumut naatsorsorneqassaaq. Taannalu isumaqarpoq akileraartarnermut allagartanni ilanngaatissatit atorlugit akileraarutissat sinneri Akileraartarnermut Aqutsisoqarfimmut akilersussagitit.

Akileraarutissat sinneruttut 18.000 koruuninit amerlaneruppata, ukiumut tulliuttumut naatsorsuutit qaavatigut sinneruttut pingasorarterutikkaarlugit akiligassiissutigineqassapput.

Malugiuk
Siumoortumik nalunaarsuinermi naatsorsuutinnut nuukkusunngikkukkit, kingusinnerpaamik 20. november akilissavatit, tapiliuttagaq 6 % saniatigut akilernianngikkukku. Piffissaagallartillugu akiliiffissaq kingulleq sapaataappat nalliuttuuppalluunniit imaluunniit arfininngorneruppat piffissarititaasoq ulluinnarmut tullermut sivitsorneqassaaq.

Akiliivallaarsimanermi utertitassat 

Aningaaserivimmi kontuit normua paasissutissiissutigisimanngikkukku, aningaasat tunniussassat Akileraartarnermut Aqutsisoqarfiup uninngatikkallassavai aningaaserivimmi kontuit normua allakkatigut tigunissaata tungaanut.

Pisortanut akiitsoqaruit utertoorutissannit akilersinneqassapput. Tamatumunnga atatillugu akiliisimalluni naatsorsuutit allagarsiissutigissavatit.

Inaarummik naatsorsuutit takukkit 

NemID-mik peqaruit
NemID-mik peqaruit inaarummik naatsorsuutit 21. august 2018 Imminut sullinnikkut takusinnaavatit. Imminut sullinneq toorukku NemID-millu isertaatit atorlugu iserlutit, tassa aallarteriaannanngorputit.

Imminut sullinneq aallartiguk

NemID-mik peqanngikkuit
Augustip naanerani inaarummik naatsorsuummik tigusaqassaatit. Taanna illit najukkattut inuit aqqisa allattorsimaffianni nalunaarsorsimaffigisannut nassiunneqassaaq.

Inaarummik naatsorsuutit annaasimagukkit Akileraartarnermut Aqutsisoqarfimmut saaffiginninnikkut assilinera pisinnaavat.

Piffissaliussaq 

Akileraarutit sinneruttut akiligassiissutit pingasorarterutinngorlugit avinneqarsimasut kingusinnerpaamik akiliiffissaata ullui tassaapput 1. september, 1. oktober aamma 1. november.

Akileraarutit sinneruttut piffissaq eqqorlugu akilerneqarsimanngitsut qaammatikkaartumik 1 procentimik ernialersorneqassapput.

Siumoortumik nalunaarsuinermi naatsorsuutinnut nuukkusunngikkukkit, kingusinnerpaamik 20. november akilissavatit, tapiliuttagaq 6 % saniatigut akilernianngikkukku.

Nammineerlutit nalunaarsuiffinni aningaaserivimmi kontuit normua allassimagukku, augustip naanerani kontunnut ikineqassapput. Imminut sullinnikkut ukiut tamaasa 9. august tungaanut kontuit normuata ‘Aallaaviusumik paasissutissat’ ataatigut paasissutissiissutiginissaanut periarfissaqarputit, tassa akileraarutitigut utertoornissat naatsorsuutigissagukku.

Allaaserisat attuumassutillit

Akileraartarnermut Aqutsisoqarfik
Postboks 1605
3900 Nuuk

Oqarasuaat: 34 65 00
Fax: 32 20 42
E-mail: tax@nanoq.gl
Nittartagaq: www.aka.gl

Ammasarfii:
Ataasinngorneq: 10.00 - 15.00
Marlunngorneq: 10.00 - 15.00
Pingasunngorneq: MATOQQAVOQ
Sisamanngorneq: 10.00 - 17.00
Tallimanngorneq: 10.00 - 15.00
Akileraartarnermut Aqutsisoqarfik
Siunnersuineq Nakkutilliinerlu
Postboks 1605
3900 Nuuk

Oqarasuaat: 34 50 00
Fax: 32 20 42
E-mail: tax@nanoq.gl
NIttartagaq: aka.gl