NemPost

Nalinginnaasumik paasissutissiineq 

NemPost’i e-mail’itut aaqqiissutaavoq isumannaatsoq aamma akeqanngitsoq, Namminersorlutik Oqartussanit neqeroorutaasoq. Kalaallit Nunaanni pisortat ingerlatsiviinik tamanik e-mail’ikkut isumannaatsumik attaveqaqateqarnissannut NemPost’ip periarfissippaatit. Tamanna ima paasisariaqarpoq qangatut allakkatut atsiukkatut atuussinnaassusilimmik e-mail’ikkut nassitsisinnaasutit.

NemPost’ip e-mail’it tamaasa paasiuminaallisakkatut (krypterikkatut) aamma digitalimik atsiukkatut nassiuttarpai. Tamanna ima paasisariaqarpoq e-mail’it nassiussavit susassaqanngitsunit atuarneqannginnissaannut qulakkeerinniffigineqartutit. Taamaattumik toqqissisimalluinnarlutit NemPost’i atorsinnaavat – aamma mianerisariaqartunik imaluunniit isertuussassanik e-mail’inik nassitsigaangavit, soorlu inuup normunnik imaluunniit aningaaserivimmut kontomut normunnik.

Digitaliusumik allagarsisarfik, NemPost’i, aaqqiissutaavoq piumasunit atugassiaq, digitaliusumik allagarsisalerumallutit sullissivik.gl aqqutigalugu ilannguffigisinnaasat. NemPost’imik aaqqiissut.

Allakkat sullissivik.gl imaluunniit Android’imut aamma iPhone’mut app’i aqqutigalugit ammarneqarsinnaapput. Digitaliusumik allagarsisarfimmi nutaanik allagarsiassaqaleraanni e-mail’isisoqartarpoq. Allakkap ilinnit atuarneqarnissaa pingaartuusoq nassitsisup nalilerpagu, sms’imik oqarasuaatinnut nassinneqassaatit. Tassa akissarsiat allagartaat, allakkat pingaarutillit allat digitalimik allagarsisarfikkut tigusinnaavatit – ulloq unnuallu ingerlanerani nalunaaquttap akunnerini 24-ni ilinnut ammasartoq.

NemPost allagarsisarfik 

Siullerpaamik NemPost’imut iseruit NemPost’ip nammineerluni adressinut allattuiffik ilinnut tunngasoq pilersissavaa, pisortat ingerlatsiviinut e-mail’inut adressit isumannaatsut, ilinnut naleqqussinnaasut ilanngullugit. Tamatuma kingorna adressinut allattuiffimmut illit nammineq attaveqarfinnik ilanngussillutillu peersisinnaavutit.

NemPost'imut ilitsersuut takujuk

NemPost’i arfinilinnut agguataakkanik iserfissaqarpoq: "Allagarsiat", "Nassiussimasat", "Allaqqitassat", "Allagaataasivik", "Eqqaavik" aamma "E-maili ujaruk". Iserfissat paarlakaajaallugit iserfigisinnaavatit, iserfissap taaguutaa toqqarlugu.

"Allagarsiat" e-mail’inik ilinnut nassiunneqartunik imaqarpoq, "Nassiussimasat" e-mail’inik illit nassiussannik imaqarpoq, "Allaqqitassat" e-mail’inik illit allatannik, sulili nassiussimanngisannik imaqarpoq, "Allagaataasivik" e-mail’inik illit toqqorsimasannik imaqarpoq, "Eqqaavik" e-mail’inik peersimasannik imaqarpoq aamma "E-maili ujaruk" e-mail’ivit imaanik tamanik ujarlernissannut periarfissiilluni.

Skærmimi qullerpaami ilaatigut nassaassaapput toqqagassat "Ikiuut" aamma "Paasissutissaatikka". NemPost’imi sunaluunniit isersimaffigigaluarukku ikiuutitut toqqagassaq iserfigisinnaajuaannarpat. ”Ikiuut” toqqarukku ikiuut taanna NemPost’imi isersimaffigisannut naleqqussagaassaaq.

"Paasissutissaatikka" tassaavoq illit nammineq NemPost’imi aaqqissuussissutit. Illit aaqqissuussissutitit nammineerlutik inissinneqassapput, aammalu allanngortinnissai pisariaqartussaassanani.

E-mail’imik nutaamik allanniaruit isersimaffigisat taanna matussavat, kingornalu toqqagassaq "E-mailimik allagit” toqqarlugu, iserfissat qulaatungaanni nassaarineqarsinnaasoq.

E-mail’i tigusimasat atuarniarukku isersimaffigisat taanna matussavat, kingornalu toqqagassaq "Allagarsiat" toqqarlugu.

Piumasaqaatit 

NemPost’imik atuineq atuisunut piumasaqaatit piffissami pineqartumi atuuttut malillugit pissaaq. Atuisunut piumasaqaatit piffissami pineqartumi atuuttut pillugit malinnaanissat illit nammineq akisussaaffigivat, taakkulu https://nempost.sullissivik.gl-imi nassaarineqarsinnaajuaannarput.

Piumasaqaatit ilisimatitseqqaarnani sukkulluunniit allanngortinneqarsinnaapput. Taamaattorli piumasaqaatini allannguutit, imaluunniit teknikkikkut allannguutit NemPost’imik atuinissamut pingaarutilimmik killiliisut qaammat ataaseq sioqqullugu https://nempost.sullissivik.gl aqqutigalugu aamma NemPost’it aqqutigalugu nalunaaruteqarnikkut allannngortinneqarsinnaapput.

Ilanngunneq 

NemPost’imut ilanngunniarlutit iserfissaq NemPost’i toqqassavat, sullissivik.gl-imi qullerpaami talerperlermiittoq.

Piumasaqaatit atuareerlugit Akueriuk toorukku digitalikkut allagarsisarfissat pilersissavat, maannalu Kalaallit Nunaanni pisortanit suliffeqarfinniillu digitalikkut allagarsisinnaanngorputit.

Pilersitsinissamut kommunimi innuttaasunut sullissivimmit aamma ikiorneqarsinnaavutit.

Allannguineq 

Tunngaviusumik paasissutissat ilinnut tunngasut qaqugukkulluunniit takusinnaavatit, soorluttaaq paasissutissat eqqunngitsut iluarsineqarnissaannik peerneqarnissaaannilluunniit piumasaqarsinnaasutit. Paasissutissat NemPost’imi takusinnaavatit, aammalu paasissutissat arlallit nammineq iluarsisinnaallugit.

Maalaaruteqarneq 

Maalaaruteqarniaruit - attavigiuk:

Digitalimik Sullissinermut Aqutsisoqarfik
Postboks 1078
3900 Nuuk
digitalisering@nanoq.gl

Maalaarutivit aqutsisoqarfimmit tiguneqarneranit naammassineqarnissaanut qaammat ataaseq tikillugu utaqqisinnaavutit. Suliakkiissutigisat naammassineqarpat allakkatigut akineqassaatit.

Inatsisit 

NemPost’i Pisortat nalunaarsuisarnerannut inatsisip ataani inissisimavoq. Tamanna ilaatigut ima paasisariaqarpoq, NemPost’i paasissutissanik suliarinnittarnermi ileqqorissaarnissamik malittarisassanik malinnittoq, paasissutissat ilinnut tunngasut avatangiisini isumannaatsuni suliarineqassasut, aammalu paasissutissat ilinnut tunngasut kimit suliarineqarnersut aamma suliarinninnermut suna siunertarineqarnersoq pillugit ilisimanninnissannut pisinnaatitaaffeqartutit.

NemPost’i nunap ilaani sumiikkaluaruilluunniit atorsinnaavat. NemPost’imik atuisinnaanngornissannut pisariaqarpoq illit pillutit tunngaviusumik paasissutissanik arlalinnik NemPost’ip katersuillunilu suliaqarnissaa, tassunga ilanngullugu illit inuttut normut. Paasissutissat illit kinaassusersinissannut, aamma illit pillutit paasissutissat susassaqanngitsunit ilisimaneqalinnginnissaannik qulakkeerinninnissamut atorneqassapput. Tunngaviusumik paasissutissanut taakkununnga Digitalimik Sullissinermut Aqutsisoqarfik akisussaasuuvoq.

Illit pillutit paasissutissat suliarineqarnerat pillugu, aamma pisinnaatitaaffivit atuutsinneqarnerat pillugu annertunerusumik paasisaqarsinnaavutit NemPost’imi piumasaqaatini aamma inuttut namminertut inuuneqarneq pillugu politikkimi.
Digitalimik Sullissinermut Aqutsisoqarfik
Postboks 1078
3900 Nuuk

Oqarasuaat. (+299) 34 50 00
E-mail: digitalisering@nanoq.gl