Qasigiannguit Utoqqaat Illuani Sundhedshjælperinik ilinniarsimasunik pingasunik pissarsiorpoq

Qasigiannguit Utoqqaat Illuani Qeersaat Sundhedshjælperinik ilinniarsimasunik pingasunik pissarsiorpoq
Qinnuteqarfissaq:
19. december 2018
Sumi:
Qasigiannguit
Ulloq aallartiffik:
1. januar 2019
Akissarsiat:
Isumaqatigiissutit malillugit
Sulilersussat 01. januar 2019 sukumiinerusumilluunniit isumaqatigiissuteqarnikkut.

Qinnuteqarfissaq kingusinnerpaamik ulloq: 19. december 2018
 
Utoqqaat Illuat nutaaq 2. November 2009-mi atulerpoq aamma Qasigiannguit Peqqinnissaqarfianut torsusakkorluni atavoq. Utoqqaat Angerlarsimaffiani immikkoortortat marluupput Qullerpaaq taaneqartarpoq Utoqqaat Angerlarsimaffiat, Qiterleq taaneqartarpoq paaqqutariaqarnerusut immikkoortortaqarfiat. Utoqqaat Angerlarsimaffiat tamakkerlugu 20-nik inissaqarpoq, Utoqqaat Angerlarsimaffiani 10-nik ineqartoqarpoq, Paaqqutariaqartut immikkoortaqarfiani 9-at, ini ataaseq qasuersaarfittut iniuvoq
 
Sulisut ukuupput: Sundhedsassistenti, Peqqinnissamut ikiortit aamma socialhjælperit, ingafiimiut, pedeli, errorsioq, eqqiasullu.
 
Suliassat akisussaaffiillu 
 
Kommunip sullisseriaasia anguniagaalu utoqqarnut politikki ataqqillugu akisussaaneq, taamatullu paaqqutarinninnermi ulluinnarnilu inuunermut tunngasuni utoqqarnik sullissinerup pitsaasuunissaanut akisussaaneq
Utoqqaat najugaqartullu pillugit sulisunut attaveqaataasunullu ingerlatitseqqinnissamut iliuuseqarsinnaaneq
Utoqqarnut najugaqartunullu Qeersaat ikiuutissatut suleriutsinik ineriartortitsinissamut pitsanngorsaanissamullu peqataaneq
Iisartakkanik inuttassaviinut tunniussuineq, nammineq aaliangiinissamut
Sulisut sullitallu qanigisaanut, aammalu utoqqaat najugaqartullu; peqqinnissaqarfiullu akisussaaffiini oqaloqatigiilluartarnissamut suleqatigiilluarnissaannullu akisussaaqataaneq
Qaammatikkaartumik nalunaarusiortarneq, oqaaseqaatinik ernumassutinik kiisalu sulianut atatillugu naapertuuttoqanngikkaangat paasititsiuarneq
Qeersaat-ni pikkorissartitsinerit, ilinniartitaanissamullu neqeroorutigineqartut aqqutigalugit pikkoriffigisanik ineriartortitsiuarnissamik isumaginninneq.
 
Piginnaasat 
 
Peqqinnissamut ikiortitut ilinniarsimasuunissaq (utoqqarnik paaqqutarisariaqartunut sullitaqarnermi pikkorissarsimaneq, imaluunniit pikkorissarnissamut taamaattunut piumassuseqarneq)
Utoqqarnik innarluutilinnillu sullissinermik misilittagaqarneq
Namminersorluni sulisinnaaneq
Suleqatikkuminartuuneq
Utaqqisinnaassuseqarneq, akaarinninneq
Tarnikkut nukittuujuneq
Tutsuiginarneq, tunniusimaneq akisussaassuseqarnerlu
Maligassaalluartuunissaq
Najugaqartunut attaveqarluarsinnaaneq attaveqaqateqarluarsinnaanerlu
Akerleriissuteqartoqartillugu aaqqiissuteqarsinnaassuseqarneq
Sungiuassiasuunissaq ineriartortitseqataarusussuseqarnissarlu
 
Atorfik una pinerlussimannginnermik allagartamik paasiniaanissamit inatsimmik pisussaatitaavoq.  Inatsit naapertorlugu aatsaat atorfinittoqarsinnaavoq kommunip pinerlussimannginnermik allagartaq tigunerata kingorna.  Taamaattumik erseqqissaatigineqassaaq ulloq atorfiniffissaq isumaqatigiissutaasinnaammat, kommunip pinerlussimannginnermik allagartaq politiinit tigoreernerata kingorna.  Pinerlussimannginnermik allagartaq naammaginarsimassappat aatsaat atorfinittoqarsinnaavoq. 
 
Isumaqatigiissutit atuuttut naapertorlugit atorfinitsinneqarneq akissarsialerneqarnerlu.
 
Atorfimmut atatillugu inissaqartitsisoqangilaq. 
 
Qeersaat Ningiuanut paasissutissat sukumiinerusut paasiniarneqarsinnaapput.  
Ningiu: Rosa Fleischer
E-mail: rosa@qeqertalik.gl imaluunniit tullersorti Mina Johansen.gl E-mail: mijo@qeqertalik.gl 
Oqarasuaat: +299 91 46 43/91 10 61
 
Qinnuteqaat, pillagaasimannginnermut uppernarsaat, ilinniagarisimasat siornatigullu suliffigisimasat, ilinniagarisimasat allagartaasa sulisitsisorisimasallu oqaaseqaataasa assilineri kingusinnerpaamik 19. december 2018 Qasigiannguit utoqqaat illuani tinguneqareersimassapput allakkatigut imalt. mailimut nassiunneqassallutik: 
 
”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Qeqertalimmi atuutsinneqalissoq. Tamanna 2019-imi ukiortaamiit eqqunneqassaaq."