airplanebooksbriefcase business cogs cross election entertainment fish house law lockmedicalpeopleselfservices socialtax

MISI Qeqertalik Aasiaat Immikkut ittumik atuartitsinermut siunnersortitut sulisussaq ataaseq

Meeqqanik inuusuttunillu siunnersuisarfimmi (MISI-mi) immikkut ittumik atuartitsinermut siunnersortitut sulisussaq ataaseq Kommune Qeqertalimmit ujartorneqarpoq.
Qinnuteqarfissaq:
10. januar 2020
Sumi:
Aasiaat
Ulloq aallartiffik:
1. Februar 2020 imaluunniit isumaqatigiissuteqarnikkut atorfinissinnaasumik.
Akissarsiat:
Isumaqatigiissutit malillugit.

Meeqqat inuusuttuaqqallu ajornartorsiutaannik suliaqarneq nuannaraajuk? Kommune Qeqertalimmi perorsaanermik, tarnip pissusaanik siunnersuisarfimmik massakkut pilersitsiniarnitsinni immikkut ittumik atuartitaanermut siunnersortimik ujartuivugut.

Meeqqanik inuusuttunilu siunnersuisarfik (MISI) suliaqarfiup INUIT ilaaniippoq, tassanngaanniit kommunimi suliaqarfiit assigiinngitsut pisarialimmik suleqatigiinnissaat qulakkeerneqartarpoq. Meeqqanik inuusuttuaqqanillu suliaqarnermi tamakkiisumik paasissutissanik siuarsaanissaq kommunip periusissiaani MISI pingaarutilittut inissisimavoq.

MISI-mi oqaloqatiginninneq atorlugu misissuisarpugut aaqqissuulluakkamillu tunngaveqartumik sulisarluta. Inersimasut meeqqanut akisussaasuusut, meeqqat ilikkagaqarnissaannik, iluarisimaarnissaannik ineriartornissaannillu qulakkeerinninnissamut paasisanik sakkussanillu pissarsinissaat suliassaraarput pingaarnerpaaq. Taamaattumik sulinitsinni pingaarnertut suliassarput tassaavoq, perorsaanikkut tarnillu pissusiinik ilisimasalittut angajoqqaanut aammalu meeqqanik inuusuttuaqqanillu ukioqanngitsuniit 18-it angullugit ukiulinnik sullissisunut siunnersuineq.

Siunnersuisartutut suliaqarfinnit assigiinngitsuneersut peqatigalugit perorsaanikkut tarnillu pissusaatigut siunnersuineq suliarissavat. Taakkua saniatigut namminersorlutit MISI-mi ajornartorsiutinik misissuinerit inuttut, suleqatigiikkaatut aaqqissuussaanikkullu suliarisassavatit. Immikkoortortami sulianik ilinniakkamut tunngasunik, suleqatigiinnermik pitsaasumillu kiffartuussinermik pingaartitsisumi suleqataalissaatit.

MISI pilersinniarneqarleruttorpoq, taamaattumik illit isummatit pitsaasut tassunga ilanngutissallugit periarfissaqangaatsiassaatit.
Siunnersuisarfik Aasianni inissisimavoq, taamaattorli kommuni tamakkerlugu, illoqarfinnik pingasunik nunaqarfittaanillu ilalik, sullissisarpugut. Taamaattumik sulinermut atasumik angalasarneq atorfimmut uunga ilaavoq.

MISI immikkut ittumik atuartitsinermut siunnersortimik ima piginnaasalimmik sulisussarsiorpoq:

  • Meeqqat ilikkarniarnermikkut ajornartorsiuteqartut immikkut perorsaaneq aqqutigalugu suleriaatsinik ilisimasalik, taamaalillunilu meeqqat inuusuttullu inuunerini, ineriartornissaanni ilikkarniarnerinilu tapersersueqataasinnaasoq.
  • Meeqqat assigiinngitsunik piginnaasamikkut ajornartorsiortut aamma/ imaluunniit inorsaatillit sullinneqarnerini tarnip pissusaanik perorsaanermillu misissueriaatsinik atuartitseriaatsinillu ilisimasaqarneq
  • Atuartup ineriartorneranut malunnaatilimmik suliniarneq pingaaruteqartillugu angajoqqaat, ilinniartitsisut, perorsaasut imaluunniit inuit attuumassuteqartut allat immikkut perorsaaneq atorlugu perorsaariaatsinik siunnersuinermik misilittagalik
  • Nammineerluni sulisinnaasoq, suliamik aallartitsisinnaasoq, ineriartortitsinissamik pingaartitsisoq minnerunngitsumillu suleqateqarluarsinnaasoq inunnillu allanik akuersaartuulluni isiginnittariaasilik
  • Pisariaqartillugu oqaloqatiginnilluni imaajaasinnaasoq.
  • Kommune Qeqertalimmi meeqqanik inuusuttunillu sullissinerup anguniagalimmik ineriartortinneqarnerani sunneqataaneq.

Neqeroorutigaavut:

  • Suliffik sapaatip akunneranut akunnerni 40-ni suliffiulluni uummaarissoq ammasorlu.
  • Atorfik unammillernartoq pissanganartorlu
  • Suliffeqarfik ataatsimoorfiusoq
  • Misilittangaqareertunik suleqateqarnissat
  • Pinngortitami pisuttuarnissamut, imaatigut angalaarnissamut, qimmeqarnissamut, sisorartarnissamut, piniariartarnissamut aalisariartarnissamullu periarfissagissaarluni pinngortitarsuaq kusanarluinnartoq
  • Kalaallit Nunaanni illoqarfiit annerit ilaanni kulturikkut neqeroorutinik assigiinngitsunik neqeroorutilimmi najugaqarneq.

Piukkunnaateqarluni qinnuteqartoq:

  • Kalaallit Nunaanni kulturi naapertorlugu sulinissaminut piareersimassaaq
  • Meeqqanik inuusuttunillu perorsaanikkut tarnikkullu sullissinermik misilittagalik
  • Tatitooq, suliassallu assigiinngitsorpassuit eqqarsaatigalugit nammineerlunilu eqaatsumillu sulisinnaasoq.

Piffissaq suliffiusartussaq tassaavoq sap.ak. akunnerit 40-t.

Meeqqanik pinerliisimannginnermut uppernarsaat:

Atorfik una meeqqanik pinerliisimannginnermut uppernarsaammik pisussaatitaaneq pillugu inatsimmut ilaatinneqarpoq. Inatsit naapertorlugu kommunip meeqqanik pinerliisimannginnermut uppernarsaatip tigunerata kingorna aatsaat atorfinittoqarsinnaavoq. Taamaattumik naalagaaffiup politiivinit meeqqanik pinerliisimannginnermut uppernarsaammik naammaginartumik kommunimi pissarsisoqareerpat aatsaat atorfinittoqarsinnaasoq, erseqqissaatigineqassaaq.

Akissarsiat atorfinitsitaanermilu atugassarititaasut:

Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissut atuuttoq naapertorlugu, akissarsiaqartitsisoqarlunilu atorfinitsitsisoqassaaq.
Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfininnerup nalaani atorfimmut atasumik inimik innersuussisoqarsinnaatinnagu sulisut atorfimmut atasumik ineqarnissaminnik tunineqarsinnaatitaasut utaqqiisaasumik ineqarnissaminnut neqeroorfigineqartassapput.

Atorfininnermi angalanermut pequtillu nassiunnerinut malittarisassat atuuttut naapertorlugit sulisitsisoq akiliussissaaq.

MISI-mi tarnip pissusaanik immikkut ilisimasalik aqutsisutut atorfilik pisortarissavat qaninneq.

Piffissap qinnuteqarfiusup kinguninngua isumaqatigiissuteqarnikkulluunniit atorfik inuttalerneqarusuppoq.

Paasissutissat sukumiinerusut

Paasissutissat annertunerusumik pisinnaavatit uku saaffiginerisigut: MISI-mi aqutsisoq Anne Thrane tarnip pissusaanik immikkut ilisimasalik imaluunniit Heidi Rosendahl immikkut atuartitsinermi siunnersorti, uku aqqutigalugit saaffiginnissinnaavutit oqarasuaat (+299) 38 73 17 imaluunniit e-mail.: MISI@qeqertalik.gl imaluunniit www.qeqertalik.gl pissarsiarineqarsinnaapput.
(Danmarkimiik sianeruit eqqaamajuk nalunaaruttap nikingassutaa, nal. 12.00-iuppat Kalaallit nunaanni nal. 08.00-iussammat).

Qinnuteqaat

Qinnuteqaatit (CV-eq) ilinniakkavit uppernarsaataat aammalu oqaaseqaat kingusinnerpaamik ulloq tallimanngorneq 10. januar 2020 tigoreersimassavagut una aqqutigalugu: MISI@qeqertalik.gl.

Tamatuma kinguninngua atorfinitsitsiniarluni oqaloqateqartoqassasoq ilimasuttoqassaaq.

Una toorlugu suliffiit inuttassarsiukkat allat takukkit.