"Meeqqat ukiuat"

Tusagassiuutinut nalunaarut. Borgmester Ane Hansen, Kommune Qeqertalik
10. januar 2019



”Meeqqat ukiuat” aningaasaliiffigineqartariaqarlunilu iliuutsinik malitseqartariaqarpoq.

 

Naalakkersuisut siulittaasuata ukioq 2019 ”Meeqqat ukioreqqissagaat” nalunaarutigimmagu borgmesteritut assut nuannaajallappunga. Taamatulli nalunaaruteqarneq aningaasaliissutinik iliuutsinillu malitseqartariaqarpoq. Kommuuninimi isumaginninnerup tungaatigut suli unammillernarluinnartumik inissisimavugut, ingammik meeqqat pillugit suliani sullissinermi.

Ukiuni kingullerni pisariaqavissimasumik kommuunit isumaginninnikkut sullissinerat sammineqarluarpoq. Tamanna nuannaarutigeqaara. Kommuunilli nutaat aappaannut borgmesteritut aamma nalunngilara aqqut suli takissammat.

”Meeqqat ukiuat” oqaasiinnaassanngippat iliuuseqarnermillu malitseqassappat Naalakkersuisut kommuunit assammik isaassinerat tigulluartariaqarpaat, suleqatigiinnerunissarlu timitalerlugu.

 

Suliat amerlassusaat appartinnissaanut suleqatigiinneq

Kommune Qeqertalimmi nuannaarutigisatsinnik maanna Isumaginninnermut Naalakkersuisup siulia isumaqatigiissusiornissamut piareersaaqatigisimagaluarparput. Suleqatigiinnermi pitsaanerusumik eqaannerusumillu isumaginninnermi sullissisut meeqqat pillugit sulianik naammassinnittarnerat sammisussaagaluarparput. Naalakkersuisunit nutaanit suleqatigiinnissap tamassuma piviusunngortinnissaa pillugu tusassalluta suli utaqqivugut.

Tamatta nalunngisatsitut nuna tamakkerlugu isumaginninnerup tungaatigut suliassanik suliarinninnikkut kinguaattooqqasoqartuarpoq nutaanillu suleriaaseqarnikkut aatsaat suliassat amerlassusaat appartinneqarsinnaapput.

Kommune Qeqertalimmit suleqataarusoqaagut, nutaamik allaffissornikkut aaqqissuussisimanitta ilusilersornera ilutigalugu allaat isumaqarpugut nutaanik periutsinik pilersitsiffissatut piukkunnaateqarluartugut. Isumaginninnermut Naalakkersuisoq nutaaq kaammattorusuppara isumaqatigiissusiornissaq taanna naammassiniassagipput suliassallu amerlassusaasa appartinnissaannut tigussaasumik iliuuseqaqatigiilerluta.

 
Akimut suleqatigiinneq immikkut kivitassaavoq

Nuannaarutigisama allat ilagaat suliniut MANU kiisami ingerlallualermat suliassaqarfiillu akimorlugit suleriutsitut atorluarneqalermat, meeqqat angajoqqaallu tamaasa pillugit. Kommune Qeqertalimmi taamatut suleriaaseqarluni ingerlaqqinnissamut piareersimavugut.

Ernumassutigisamali annerpaartaat tassaapput angajoqqaanngulersut inuuninerminni aarleriniartorsiortut. Annertunerujussuarmik ataqatigiissaarisariaqarpugut, suliffeqarfinni ilinniartitaanermilu suliassaqarfiit annertunerujussuarmik akuutittariaqarpavut. Karsikkaartumik eqqarsartariaaseq qimavissagutsigu Namminersorlutik Oqartussat tamakkerlugit minnerunngitsumillu kommuunit annertunerujussuarmik akuutinneqartariaqarput.

 

Iliuusissanik pilersaarusiornermut kommuunit akuutinneqassapput.

Qujanartumik Inatsisartut nuna tamakkerlugu meeqqanut inuusuttunullu iliuusissanik pilersaarusiortoqarnissaa Naalakkersuisunut suliakkiutigeqqammerpaat. Kommuunit tamakkerlugit suliamut tamakkiisumik ilanngunneqassasut Kommune Qeqertalimmit piumasaraarput, pilersaarummimmi Namminersorlutik Oqartussat iluanni taamaallaat atugassiaasumik suliaqartoqaraluarpat nikeriaqqippallaarnavianngilagut. Ernumanarporli Inatsisartut 2019-mut aningaasanut inatsimmi isumaginninnermut suliassaqarfik ilanngullugu sipaangaatsiartoqarnissaanik aalajangiussaqarmata. Neriuppugut tamanna meeqqanut inuusuttunullu suliniutinut kingunerlussanngitsoq.

Naalakkersuisut borgmesterillu allat Politikkikkut Ataqatigiissaarisoqatigiit tulliani naapilerpata tamakku eqqartornissaannut qilanaarpunga, naatsorsuutigaaralu meeqqat inuusuttunullu iliuusissanik pilersaarusiornissamut pilersaaruminnik Naalakkersuisut saqqummiivigissagaatigut.

 

Kommune Qeqertalimmit suleqataassalluta piareersimavugut.

Ane Hansen

Borgmester Ane Hansen, Kommune Qeqertalik