Ilisimatusarfik tassaavoq Kalaallit Nunaanni kisiartaalluni ilisimatusarfik, ilinniartitaanerillu assigiinngitsut aqqanillit neqeroorutigai bacheloritut kandidatitullu qaffasissuseqartut.
Ilinniartitaanerit tiguneqarnissamullu piumasaqaatit pillugit paasissutissat annerusumik uani
www.uni.gl takusinnaavatit.
Ilisimatusarfimmut qinnuteqarneq ilutigalugu ilinniagaqarnersiuteqarnissamut qinnuteqassaatit.
Ilinniagaqarnersiutit pillugit annerusumik atuaruk.
Ilisimatusarfimmut qinnuteqarniaruit maana sullissivik.gl aqqutigalugu qinnuteqarsinnaavutit imaluunniit qinnuteqaatit Piareersarfimmut Majoriamut illoqarfigisanniittumut tunniutissavat nassiulluguluunniit.
NemID’qaruit
NemID’eqaruit NemID atorlugu isersinnaavutit toqqaannartumillu sullissivik.gl-ikkut qinnuteqarlutit.
Imminut sullinneq qulaaniittoq tooruk NemID’lu atorlugu iseriarlutit aallartillutit.
Eqqaamallugu
Sullissivik.gl-ikkut Ilisimatusarfimmut qinnuteqassaguit qinnuteqarnermut uppernarsaat takussutissatut toqqussallugu pingaaruteqarpoq.
Qinnuteqarninni mail-it allakkukku uppernarsaat mail-ikkut pissarsiarissavat.
NemID’qanngikkuit
NemID piginngikkukku qinnuteqaammik ’
Kalaallit Nunaanni ilinniakkanut aamma ilinniagaqarnersiutinut qinnuteqaat immersugassaq’ aqqutigalugu aallersinnaavutit Majoriarmullu illoqarfigisamiittumut tunniullugu imaluunniit qinnuteqaat immersoreernikoq nassiullugu.
Qinnuteqaatip pappilissap immersornissaanut ilitsersuut atuaruk.
Malugiuk
Kollegiamut immikkut qinnuteqartoqassaaq
www.kaf.gl aqqutigalugu. Nuumminngaanneeruit kollegiamik qinnuteqassaatitPiareersarfik Majoriaq Nuummiittoq aqqutigalugu.
Akuerineqarnissamut qinnuteqaatit Ilisimatusarfimmit suliarineqassaaq, ilinniagaqarnersiuteqarnissamut qinnuteqaatit Ilinniagaqarnersiuteqartitsivimmit suliarineqassaaq, kisianni taakku tamarmik Ilisimatusarfimmit allaffissornikkut aqunneqassapput.
Kingusinnerpaamik maajip 15-iani nalunaarfigineqassaatit akuerisaasimanerlutit imaluunniit akuerisaasimannginnerlutit.
Ilinniakkamut akuerisaanissamut soraarummeernissaq suli naammassisimanngikkukku piumasaqaatitalerlugu akuerisaagallarsinnaavutit, tassalu soraarummeeruit aalajangersimasumik angusaqarsimanissat.
Eqqaamallugu soraarummeersimanermut uppernarsaat nassiutissagakku kingusinnerpaamik ulloq 30. juni. Ilisimatusarfiup soraarummeersimaninnut uppernarsaat tigoreerpagu kingusinnerpaamik juulip 15-iani akuerisaanerlutit akissutisissaatit.
Ilisimatusarfimmi aallartinnissamut akuerisaaguit aallartinnissat akuerinerlugu Ilisimatusarfimmut nalunaarutigereerukku ilinniarnissap aallartinnissaa, ilinniagaqarnersiutit il.il. pillugit annerusumik Ilisimatusarfimmit paasitinneqassaatit.
Qinnuteqaatit allanngortinniarukku, atorunnaarsinniarukku imaluunniit ilassutissaqaruit taava illoqarfigisanni Piareersarfimmut Majoriamut saaffiginnissaatit qinnuteqarfissamut killissarititaasoq ulloq 1. marts nallertinnagu. Tamatuma kingorna Ilisimatusarfimmut
studieadm@uni.gl saaffiginnissaatit qinnuteqaatit tunuartinniarukku, ilassutissaqaruit imaluunniit paasissutissanik allannguiniaruit.
Kingusinnerpaamik qinnuteqarnissamut piffissaliussaq tassaavoq ulloq 1. marts.
Eqqaamallugu soraarummeersimanermut uppernarsaat tamakkiisoq nassiutissagakku kingusinnerpaamik ulloq 30. juni.
Isumaqaruit Ilisimatusarfiup akuerisaanissamut aalajangiinera maleruagassanik unioqqutitsisimasoq maalaarnissamut pisinnaatitaaffeqarputit. Maalaarut allaganngorlugu nassiunneqassaaq ilinniartut allaffeqarfiannut:
studieadm@uni.gl. Maalaarut tunngavilersorneqassaaq tunniunneqassallunilu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.