Kommune Qeqertalimmi kommunalbestyrelsimi ilaasortat kiisalu nunaqarfinni aqutsisut ukiut tamaasa ingerlanneqartartumik, Qeqertarsuarmi missingersuutit pillugit 24. aamma 25. juni 2020 isumasioqatigiipput. Isumasioqatigiinnermi innuttaasunik tusarniaanermi pilersitassatut kissaatigineqartut kiisalu qinikkat kissaataannik aallaavilinnik oqallittoqarpoq. Isumasioqatigiinnermi ilanngunneqarput siunissaq ungasinnerusoq isigalugu suliassat annertuut ingerlaavartussallu nalilersuiffiginerat.
Kommune Qeqertalimmi kommunalbestyrelsimi ilaasortat kiisalu nunaqarfinni aqutsisut siunniuppaat, Kommune Qeqertalimmi ukiuni tulliuttuni sanaartugassani salliunneqassasut inissialiornerit, meeqqerivinniit utoqqarnut atungassarititaasut pitsanngorsarneqassasut tamannalu anguneqassaaq nutaanik pilersitsiortornikkut. Inuussutissarsiorneq umiatsiaararsortunut amutsiveqarnikkut iluarsaassisarfeqalernikkut kiisalu ammeriveqarnikkut pitsanngorsaasoqassasoq.
Siunniunneqarportaaq siunissami sanaartukkat tamarmik nusuttakkanik imikut aqqutaannik (kloak) pilersorneqalissasut, tamannalu ukiut 20-it tulliuttuni anguniarneqassasoq inoqarfinni tamani kuutsittakkanik anartarfilersuinerit naammassineqassasut.
Kommune Qeqertalik eqqiluisaarnissamik ilorrisimaarnarnerusumillu innuttaasut atungaqalernissaanut suliniuteqarnissani pingaartillugu siunniuppaa, tamatumanilu kissaatigineqartunut ilanngunneqarpoq imikut aqqutaat. Imikut aqqutaat pillugit illoqarfinni tamani Kommune Qeqertalik sulianut attuumassuteqartunik siunnersuisartunik misissuisitsisimavoq, ukioq manna aappaagulu nunaqarfiit ilanngullugit misissuivigineqassapput. Illoqarfinni imikut aqqutaannik misissuisitisimaneq siunnissamut tunaartaliunneqarsimasoq saqqummiunneqarpoq. Tamatuma saniatigut illugissarnerit illunillu najoruminartunik sanaartornerit ingerlaavarnissaat siunniunneqarluni.
