Borgmester Ane Hansen-ip Covid-19 pillugu oqaaseqaataa 23. oktober 2020:
”Asasakka Kommune Qeqertalimmi innuttaasut, ippassaq paasissutissiigama malinnaatinniarlusi neriorsuinikuungama, ullumikkut nutaarsiassaq nuannersoq oqaatigerusuppara.
Tassa ippassaq angalaqaterput Corona virusimut tunillatsissimasumut qanigisaasoq misissortikkami, misissortinnini paasivaa aattortissimanani, tassa negaviusoq, taavalu uangut angalaqataasut ullumikkut Nunatta Nakorsaaneqarfianiit nalunaarfigineqarpungut ajunngitsugut, taavalu anisinnaalertugut angerlarsinnaalertugullu, taanna tusagaq oqiliallannartorujussuuvoq, karantænerunnaarpugut tamattalu angerlarsimaffitsinnut angerlarsinnaalerluta aammalu tunillatsissimannginnerput qulakkeerlugu.
Ipassaq paasisatsinnut ilaavoq Danmarkiminngaanniit angalasimalluni angerlartoq karantænerfissani ullut naammassinngitsut suli pulaartoqarsimasoq ajoraluartumik, taannalu pissutigalungu politiinit suliassaq ingerlanneqarpoq, pulaartorisimasai tamarmik apersoqqissaarneqarlutik, qanga pulaarsimanersut aammalu tamatuma kingorna kikkut attaveqarfigisimanerai.
Kissaatigissuara taakkua politiininngaanniit attavigineqarsimasut immikkut isumannaallisaaneq eqqarsaatigalungu inassuteqaatit maleqqissaaqqullugit, tassa angerlarsimaqquneqarunik angerlarsimaannassapput nutaamik tusagaqarnissamik tugaanut.
Aamma pingaartorujussuuvoq ulluni makkunani immikkut Corona pillugu upalungaarsimanermi ileqqoreqqusat malilluarneqassasut, soorlu:
-
- Errukulaassasugut.
- Assangut spritertassagingut.
- Quersorniarutta quersortassasugut talitsinnut.
- Pisiniarfinni sapinngisamik 2 meter ungasissuseqarnissaq.
Tamatuma saniatigut utoqqaat illuani naliginnaasumik pulaarnerit unipput, unikkallarput allatut nalunaartoqarnissaata tugaanut, kissaatigissavara utoqqartagut taavalu napparsimasortagut aamma immikkut pulakaffigineqassanngitsut aattortinnginnissaat sianigalungu.
Akisussaaffik innuttaasuniippoq aamma oqaatigerusuppara kikkulluunniit agalasimasunik ilaqutallit imaluunniit ilisarisimasallit tamarmik ilisimassavaat, Danmarkiminngaanniit angalasimasut tikikkaagamik minnerpaamik ulluni tallimani mattusimaneqaqqusaasartut, tassa inunnut akuliunnaveersaassasut, pulaartoqassanngitsut taavalu pulaarneqassanngitsut, taanna akisussaaffik sukannersorujussuarmik malinneqassasut kissaatigerusuppara pingaaruteqartorujussuummat, takoreerparput qanoq sukkatigisumik pulaarsimasoq ataasiinnaasimagaluarpalluunniit qanoq sukkatigisumik napparsimalertoqartillugu siammaasoqarsinnaasoq. Tamanna pinaveersaarusunnartorujussuuvoq, taamaammat kissaatigeqqissavara maleruagassat malinnisaat akisussaaffik ilissinniippoq aamma tatigivassi akisussaaffimmik kivitsisinnaasutut aamma malinnissinnaasutut.
Immikkut iliuusitta ilagivaat qaammatip naanerani pisiniarfinni inuppassuit ataatsikkut pisiniannginnissaat siunertaralugu, utoqqalinersiallit aamma siusinaartumik sulisinnaajunnaarnersiutillit ulloq ataaseq sioqqullugu qaammammusiaat tunniunneqassammat, inuppassuulluni niuffatinnginnissaq siunertaralugu.
Taassuma saniatigut immikkut sianigilluarnissarsi kissaatiginartorujussuuvoq aamma sapinngisamik inuit amerlavallaat akornannut akuliunnaveersaassasusi, upalugaarsimaneq siunertaralugu. Tamassi sapaatip akunnera naalluarniarisiuk.”